बारसे बिबार दंमोन Poem by Ronjoy Brahma

बारसे बिबार दंमोन
बिनि सेराव बाहां-बिरहां
बेरे सिखिरिखौ आं नुदोंमोन
फुं आरो बेलासि
जेब्लानो आं बिनि सेराव थाबायनानै फैदोंमोन
गोदान बोसोरनि गोगो बार नागिरनानै

आं सिमां नुदोंमोन
मानोना बियो आंखौ सिमां नुहोदोंमोन
आरो आंनि सिमांफोरा
सिखिरिनि महराव गुस्लायबाय थानो हमदोंमोन

हिमालया हाजोनिफ्राइ बारज्रुमनानै
जुब्रा जानाय गथ'बादि नाङो दासानदि आं
जाय सिमांफोरखौ आं नुदोंमोन
बेफोर मोगथांनि बेसेबा गोजानाव
बिबारानो आंनि जोबथा मुलुग गोबानायनि सिमांमोन

दिनै गोदान सिमां सुजुनोबो
नैबै आंनि गोरबोआव गाराय जाबाय
दानिया बेखौसो फाहामनायनि सम
गसाइ अबंलावरिनोबो हगारनानै होनो हाया
फोथायो आं फोथायजाथाव अबंलावरिखौ
अब्लाबो नाथाय आं थारला गावखौ हगारनानै होनो हाया
आंनिनो गोरबो आंनो फाहामनांगोन

खामानिनि मानसि आं
खामानिया जेब्लाबो आंनि गोदोना हमफैयो