(मदाराम ब्रह्मनो बिबार बावनानै)
सिबिजाथाव मानसिखौ जों मान खालामो। - देबेन्द्र नाथ शर्मा
गेदेमा! नोंनि बिसम्बि बुथुम बुथुम
लिरलांबाय नोंथांआ लोगो मोननाय सुबुंफोरा
नोंथांनि जिउखौरां।
सानब्लाबो सानखनो हायै नोंनि आगान
बुफ्रुनाबो जामा-जोबा नोंनि सानस्रि
जों दा सावरायो बायसेथ्रा नोंनि बाथ्रा आरो जिउखौरां
फरायो, सोलोङो आरो मान होना गाबज्रियो।
नोंथांआ बहा बहा गैया?
रावबो बुंजोबनो हाया।
गेदेमा! नोंथांआ गोसोखां जाथाव
नोंथांनि आगान जों दाबो नुयो
समाज सिबियारि
नों अराय मावथि। दावगानायनि बिदिन्थि
हारि-माहारि हादोर अनफावरि
गेदेमाफोरा बुङो-
नोंथांआ जेंनाजों दावहा होगिरि
खैफोदजों जेनरोङै थुलुंगानि थान्दै
आंखाल बुगिनायनि आंखाल सुफुंगिरि।
हारिनि अलखद समाव दाहा जायोमोन
नाथाय दाहाया नोंथांखौ बेंगुरा खालामनो हायामोन
मानोना नोंथांआ खर'-मेलेमनि सोलोजों
राहाखौ आखाय फोलावबानो मोनोमोन।
जनजाती आरो साधारण सुबुंफोरनि थाखाय
नोंथांआ बेसेबांदि सोलोंथाइ दिहुनथाइ आरो
जिरायसालिफोर गायसनलांदोंमोन
साननो नाजाब्ला जोंहा आदुवासो जागोन
नोंथांआ अराय फोथाय जाथाव
रायजोनि असे थान्दै
दोहोरोम सिबिसुला आरो थुलुंगा जोहोलाव
बेखायनोथ' भारत सोरखारा फद्मस्री होदोंमोन।
नोंथांआ दान जोहोलाव
दान होदोंमोन आरो मोनदोंमोन दान
मानलाइ आरो गोथार सिबिथाइ।
जोबनो गैया नोंनि बिहोमा
नोंथांआ रोजाबदोंमोन
बिजिरदोंमोन-सैथोखौ दिहुनदोंमोन
नोंथांआ हारिखौ सिनायथि होदों-फसंदों
अरायबो साब-सिखोनै दावगानो बोसोन होलांदोंमोन।
हे गसाइ! बिथांनि जिउमाया सोर्गोआव गोजोनै थाहैथों
आरो बिथांनि थुलुंगानां सोरजिफोरा
अरायबो गोजोर जानानै थाथों। बेफोर
इयुन जोलैनि थाखाय फरायनां जानानै थाथों
This poem has not been translated into any other language yet.
I would like to translate this poem