आं खुबैहरगोन नोँनिसिम आंनि मिनिनाय Poem by Ronjoy Brahma

बैसागि सिख्लाया ओरैबादि समायना जानानै मोसाफैगोन
समायना जानानै बुंदोँ आंनि गुस्थियाव
गोसोआव सिरि सिरि बुङो बारआ
मिथिँगा सिखोला देलाइमांग्रिया देलाइनायाव मुखुबथार दा

बियो लाइगां दखना गानदोँ
गोलोमस्राव गोलोमस्राव गोजांस्रिउ गोजांस्रिउ देहा
जिरोन गैयै बंफांनि बिलाइ गिदिर फिसा
बार सिबनानै होदोँ। बार सिबनानै होदोँ

सम सम आजोलिनि खर'आव
अनसुलि जोमैआ दै लुनानै होदोँ
बिबार मालियासो जेन बिबारनि बिथ'आव लुदोँ
आं हास्थायो खेबसे गुस्थायनो बे खेबाव

ओइ लोगो नोँनि मिनिनायखौ आंनिसिम खुबैहर
आं खुबैहरगोन नोँनिसिम आंनि मिनिनाय
अदेबानि आं आंनि खुसिखौसो होननानै बुंदोँ

दुब्लियाव फोथारआव हाजोआव हायेनाव
मोनफ्रोम गाथोननि सेर सेर समायना गांसो
फेरेँगा लानजाइ मोसादोँ साफेन-सुफेन दिँखिया बिथराइ

बैसागुलै बैसागु होननानै बयबो हामफ्ला-सिफ्ला
बैसागुआ नोँनिल' नङालै आमोखा
मोसौ सैमा दाउ हांसो फारौ मावजि
हाग्रा जाहारआव थाग्रा जिब-जुनार दाउसिन

दैसायाव दैमायाव लैथो-लैथोमायाव
अख्रांआव थाग्रा सोब बयनिबो थाखायनो बैसागु