बिसम्बिफोरा गोजावलांबाय थायो Poem by Ronjoy Brahma

आं नोंनि मोसानायखौ नुबायथायो आंनि मबाइलआव
होनबा आं ओरैबादि मोनो
आं जेन'बा नोंखौ सिमांआवसो नुबायथादों मैआ आरो मैआनि सिगांनि हराव
आंनि गोसोआ दा अर्जुनमोननि फिरफिलाबादि जांख्रिखाङो

अब'से दा आंनि साखाथि-फाखाथि बारनाय बारआ बथलाव सोजानाय नंलिया
हायाव गफबलांनाय गिबि फागुणनि बिलाइ गोरानबादि गाबलिया
गोसोफोरा नेहाद खुमब्रा फिथाइबादि सेवलांनो नागिरलिया
आं दानिया सिरि मोनफिनबाय नोंनि फास्रानि बार मोननानै

लाथिख' दाउदैआ मोसा मोसा दाउसानि महर लानायबादि
आंनि थैहाबनायनि उन्दुनायआवनो खारलांबाय गोबां हर
आं सिरि मोनो निहिर गास्रि गास्रि नोंनि मोसानाय मेथाइआव
बे बारआव गांखं फोरानानै दाउसा बादि आं आदार खनजागोन

गोजाननिफ्राइ खेबसे आसोल नोङो मिनिदेरहरनाया
दिनैबो फुंआव गुरै बारजों मेथाइ जानानै बिरबोयो
नोंनि मेगन आरो बिरनाय खानायफोरा खन्थाइ जानानै मोसायो
अब्ला आं दैनि अन्थाइबादि गावखौ लरेद सोमावो

बेबादिनो बिसम्बिफोरा गोजावलांबाय थायो मेथाइ रोजाबनानै
ओंखाम थफ्ला जोबब्लानो बादारिआ नफारसे गिदिंबोफिननाय बादि आं
नै सिख्ला नोंखौ आं एथबां लोगो मोनब्लाबो गोसो थोखोमाब्लाबो
गारां फाहामनानै फंसेबो रायज्लायनोनो हायाखिसै जेबोखौनो