मोन्थाइ दं आंहाबो Poem by Ronjoy Brahma

मोन्थाइ दं आंहाबो
थांनानै थानायनि
बे हायाव बिफांफोरबादि रोदा सुथाबनो
नखोरांनि हाथर्खिफोरबादि जोंथिनो

मोन्थाइ दं आंहाबो
दैमाफोरबादि- लैथो लैथोमाफोरबादि
गासै सान हर मेंनाय खोमानानै जुगामि बोहैनो हागौ आंबो

गोबां दुखु जारलानि गेजेराव
देहा आरो बिखानि सानाय आलौनायखौ लानानै
मिजिं बायफ्लेनाय
मोननाय खोमानांनायनि गेजेरावबो
जायगा दं आंहाबो बे मुलुगाव

आंनि मिनिनाय गाबनायनि जाहोनखौ नोंसोर मिथिगौ
आंनि मोननो लुबैनाय आरो उनफिननायनि जाहोनखौबो नोंसोर मिथिगौ
आंनि लोमजानाय आरो लाजिनांनाय नोंसोर मिथिगौ
बेनि गेजेरावनो मोन्थाइ दं आंहा बे हायाव
बिलाइ सिरिगारनाय बिफांफोरबादि फिन गोदान बोथोर जुरिफिननो
रानज्रिंलांनाय दैसाफोरबादि गोदानै सम जुरिफिननो