गं बेसे गाथोन बारबोखो नों Poem by Ronjoy Brahma

नोंखौ मिथिगौ नै जोहोलाव
हाग्रा बंग्रा हाजो हाला
जेबो सौसिबोनानै सफैबाय नों गोदान गामि
जाय गामिया गोदान मुगाजों खारफानो हमदों
बेखौनोथ' लुबैदोंमोन रैखाथि होदोंमोन नों
गंसे गोदान मोखां लानानै

नोंनि फेन गस्ला गासैबो गिसि
गं बेसे गाथोन बारबोखो नों
नोंनि बिखानि मावनायावनो सिनायनो हायो
दैनि दाहार मोसौ फाफ्लि गोबां फेजेन बोदों नों
नोंनि खमफिनाय गुस्थियाव दाबो हमनो हायो
नोंहा बुंनांगौ दं

बुंनो हायो गावनि थांखि आरो मिजिं
थांनानै थानो लुबैनाय

हाग्रा बंग्रा गिदिंबायनानै
दैमा दैसानि दाहार फेजेननानै
उदैनि उखैनायखौ खोमानानै
बमा बारुद सिलाइनि गुलिखौ खोमा सेरजों फोजाव हरनानै
मोनसे मुगा उथ्रिबोदों नों
गावनि दोंसे देरहासार सल' सुजुबोदों
गं बेेसे गाथोन बारबोखो नों
बेनि बेसेनखौ नों बुजिनांगोन आरो बुजिहोनांगोन