जोंना आयआ जोबोद जामबि Poem by Ronjoy Brahma

सासेल' नङा
सासे सानै साथाम........
सासेनि उनाव सासे जोनोम होदोंमोन गोबां फिसा
फिसा हौवा फिसा हिनजाव

एखमबा एखमबा मालायनि जिराद खावग्रा जाबाय आदाया
मालायफोरजों रायजा बुजाहरनायनिबो गोबां हिसाब जाबाय
दायनिगिरि जाबाय
आयखौ बिखा गावलायनाय दुखु होबाय

आयखौबो रायहरबाय कृष्ण बिमा योसदाखौ
रायहरनायबादि ओरै होननानै-
नै आमोखि नोंसिनि फिसाफ्रा बायगर जाजोबथारबाय

सासेनि दायआवनो गासैबो?
गासैबो दाय नांबाय सासेनि थाखायनो

नंमारगौ नंमारगौ
आलु दरसेनि थाखाय गासै आलुवानो गेसाव होनना मुं मोनो

आयै नों जोबोद जामबि
नोंनि फिसाफोरा आखलखौ दानानै लानो रोङाखिसै
नोंबो फोरोंनो रोङाखिसै
मानोना गोदोनिबादि सल' खिन्थानोबो समा दा गोलाव नंलिया

जों खेबसे स्राय मोखां दिन्थिलायनानै
जौसां मोनसे बानायनो हायाखिसै
जौसां
आयनि बिखायाव दाउसाफोरबादि एब्रेनायनि

नाथाय जोंना आयआ जोबोद जामबि
फिसाफोरखौनो आवसारि खालामजोबबाय
सिलायाबो थिउ साबफैदों
मोसायाबो गेबा गेब बारसिनफैदों