बेबादिनो दैबाना फैबायथायो जोंनि सिद्लायाव Poem by Ronjoy Brahma

ननि मानसि जों
जायखौ जेब्लाबो गोजोर थाखुलि होननानै साननानै लाबोदों
जाय हायाव जोंनि सिमांआ बेसेबांबा गेदेर
बेवहाय गले गले दैबाना फैबायथायो
आरो जोंफोरा नखौनो गारनानै खारनांगौ जायो

गोदान गंसे हादान नांगौ
बबेहाय गोदानै फिन गोजोर हादान फसंनो
बेयो जोंनि दैबाना लोमजानाय गोसोआव साननाय फैयो

जोंनि थै आरो गोलोमदैजों आरजिनाय
मेगननि मोदै देहानि सानाय आलौनाय
आरो खोमसिखौ सोरां खालामनानै माखनबादि आवथिना आरजिनाय दोहोनफोरा
गोजावलाङो दैबानायाव जुहुद्रुद जुहुद्रुद

खैफोदनि सम सोरखौ आर'ज गाबनो
अबंलावरिखौ ना दैदेनगिरिखौ
ओजों अबंलावरिया खेरखेराया
दैदेनगिरिफोराबो फारसे नुयो फारसे खाना
माबोरै आखाय फोलावनो

गले गले बेसेबां गाबनो
सोरखौ हांख्रायनो
मा राहा दिहुननो माबोरै होबथानो
बेबादिनो दैबाना फैबायथायो जोंनि सिद्लायाव