नोँनि महरनि सौग्रावनायाव Poem by Ronjoy Brahma

नोँनि महरनि सौग्रावनायाव
उसु-खुथु मोन्दोँ थाथिरै
बोदोर जादोँ मानोबा फंसे बाथ्रानि
अनजालि सिख्ला नोँनि।
गोरबोआव रैसुमैखौ बावगारै
नोँखौनो सान्दोँमोन रैसुमै,
मोनाबिलि आमटेका दैसायाव
आनज्रो आनज्रो नोँदि-
बेसेबा नायदोँमोन आंनि लोहाबनायखौ।
बाथ्रानि सेर सेर खाथियाव
नोँबो रायदावदोँमोन आंजोँ
खामानि मुखुब समायाव,
गोदै गेस्रेम रैसुमै रावै-
'उन्दुनायानो जायाखिसै हरफा मानि
थांनाय सान-हर मुखुबथियाव
मेँग्लिनानै'
सानबा हरबानि दिनै बाबेनलांनाय
फंसे बुंनांगौखौनो लाखोमाबाय आं
आरो जानांगौ नोँबो?
बिदायनि समाव खेबसेल' मेगनजोँ
जानांगौ गोसो गोथारै रायदावबाय,
आखाय मिजि मिजि फावै
मिनिस्लु मिनिस्लु सोमावलांबाय;
दिनै लोगो मोन्नाय अनजालि
सान सानबा हर हरबा बै-
बावनो हायाखै राव फाव।
सोमोन्दोआ ब्रह्मजोँ फानफ्रेजानाय
नोँ बुंदोँ आंखौ आफा।
आं बुंदोँ नोँखौ आय।
लोगो मोनगोन आरोबाव
गोरबोआ सान्दोँ दिनै
बुंगोन आं बुंगोन थियारि-
'नोँखौ बावनो हायाखै
सानबा हरबा लोगो मोन्नाय सानैजोँ।'
गोरबोनि गासैबो लाखोमाबाय
गोसोनि सान्नाय गासैबो बाथ्रा
गावनि होन्ना फोरमायनानै।