थिरिँ बिरिँ 1152-1215 Poem by Ronjoy Brahma

1152
आंहा गाबनांगौ दं
मानोना सानसे आंनिबो
आद्रा समा सफैगोन।
1153
आंहा सिबिनांगौ दं
मानोना-
आंनिबो जोनोमा थार।
1154
आंहा रंजानांगौ दं
थारै आंनिबो गोजोन्नाय दं।
1155
आंहा सोलोँनांगौ दं
थारैनो-
आंहाबो मिनिनांगौ दं।
1156
आंहा लाजिनांगौ दं
मानोना-
आंनिबो गोरोन्थि दं।
1157
गसाइआदि आंनो आंखालखौ हरदोँ
गसाइआ आंनो नांनायखौ होआब्ला?
1158
नंगौ गसाइआनो गुदि
सोर्गो नोरोक फाथाल
मोनथाम फुरिनि।
1159
अखा अखा गोग्लैदोँ
फैबाय फ्रि फ्रि मोसानानै
हांसो सिलारि मोसादोँ
बिरबायनानै-
1160
बिफां-लाइफां बारजोँ मोसादोँ
जोँनि गोसोआ थाजिम
जोँबो खुसियै रंजादोँ।
1161
एम्बु गाबदोँ अखानि खुसियाव
फ्रि फ्रि अखा दैज्लांनि
हायना मिथिँगा नायनो मोजां।
1162
आंनि गोसोनि देरायाव
दा दा नांफैयो सोरां सान
मिनिसुलु मिनिफैयो अखाफोर
सोरां अराय सान हर।
1163
आंनि गोसो बिबार बारियाव
गेवलां गेवथां बिबारबारो
गोगो गोरबोनि गोथार गोसोजोँ
बाहां बिरहां बेरे सिखिरि।
1164
आंनि गोसो लैथोआव
सान्थ्र हायै जिउसाफोर
समायना समायना
बै रुगुं रुगुं दावबायो।
1165
आंनि गोसो अख्रांआव
उदांङै बिरबायो गुफुर दाउथु
मेँनाय गैयै गांखंजोँ-
फैसालि गैयै सिमासिम।
1166
आंनि गोसो मुलुगाव
सोमखोर आबाद खालामो
मावथि आबादारिफोर
मिजिँ गोनां संसार जायो
1167
मिथिँगा-
आंनि गोरबोआव
नोँ जेब्लाबो
सायख्लुम सारफावना होयो-
1168
बे गुसु फुंआव
आं बेरायग्लांदोँमोन
सान्दोँ रंगिना सानखौ
दाउसिननि रोजाबनायजोँ।
1169
सुदेम गेलेनो नाजादोँ
गोरबोनि रेबगनजोँ
नाथाय अलसिया आं।
1170
खोमसि जोमैया
आं आं हाथर्खिखौ खोबथेदोँ
सान गैयै खोमसियाव।
1171
फैगोन फैगोन सोरांखौ
सानमोखाङारि नेना दं आं
जिउनि फुंखौ बरायना।
1172
आंनि खुसिजोँ सान ओँखारोमोन
आंनि मिनिनाया बिबार बादिमोन
बेसेबा गोदैमोन मेथाइ
बेसेबा गोथारमोन गोरबो बिथराइ।
1173
साना फुंनि आबिर सारफावो
आंनि मेगनखौ बेखेवो
बेसेबा समायना
बै समा जोबोद रंगिना
मुलुग मिथिँगाया जोबोद खुसिमोन।
1174
आंनि गोसोआ जोबोद गुरै
मेथाइआ मिनिखुरै
फुंनि गोजोँ निहोर
दैज्लांनि सानफोरजोँ।
1175
बाथि जोँनाय बादि खोमसियाव
अख्रांआव हाथर्खि-
बेसेबा खुसिमोन आं
1176
लांदां आंनि गोरबोआव
मोनसे गोरबो दाजाबफैदोँ
बेसेबा गोजोन अखाया
फ्रि फ्रि गोरबोआव हादोँ
1178
सान गैयै बे समाव
जेबो नुयै जेरैबो
आं खोनायो सैमा सोँनाय
1179
बे मेथाइआव फाराग दं
रमान्स आं हांगामानि
जाय आंनि बिखा सौओ
1180
हार्सिँ सोमखोर दुब्लियाव
सोनाब रुगुं मोनहरै
फोलावो आगान गोसोआ
1181
मेगना साजायदोँमोन
बेसेबा साया माया
बै बारनि खुदुमनाय
1182
गोसोआव बोनाय
जिउ बैफोर मेथाइखौ-
बावहरो आं बेसेबा उनाव
1183
गोरबो हाथासि मेगनाव
सांग्रेमा बिरदोँ सोरांआव
नागिरदोँ सानस्रि सिमब्रेना
सोरांखौ अराय-
1185
अख्रां गंसे
दुफावलु जोमैया साग्लोबो
बेबादि हराव-
मुरुना थायो हाथर्खिफोर
1186
बयबो उन्दुलांनाय हराव
लामायाव हाद्रिया मिनिग्लाबो
बेबादिनो बारजोँ बिरबायो
1187
गोजोन मोनदोँ आं
बे फागुणआव
देरहायै देरहायै गोरान हाद्रि जेन्नायखौ।
1188
सुदेम आं दिनै
आंनि खर' गंसे गिदिँनाय
दुंहाव रागाफोरा जिमायदोँ।
1189
बेसेबा खुसि आंनि
लाथ्र हायै नैबेफोर गोजोनखौ
अबं नोँनो होनाय जादोँ।
1190
आं दा आंनिनो
रैरुबु रैसुमै गोरबोजोँ
नैबे लामाजोँ-
मिनि खुसि थाबायलांगोन।
1191
आं गोमोदोँमोन
दुफावलु जोमै लानाय अख्रांखौ
जेन'बा आं सिग्लाब जोबगोन अखाजोँ।
1192
हार्सिँङै सोमखोर दुब्लियाव
सोमखोर मिथिँगाखौ
नागिरो बे फागुणआव।
1193
बारजोँ बिरबायदोँ
रैसुमै बिबारनि मोदोमनाय
गेवलां गेवलां समायना बिबारनि।
1194
अख्रांआव जोँना थायो
जोँथि माथि हाथर्खिफोर
मिनिखैरो नायहरना खुसि आं।
1195
फ्रि फ्रि जेरैबो
बिफां आरो गांसोआव
समायना मोसाग्लांदोँ अखाया।
1196
सोमखोर मिथिँगाया खुसि
दालाइ-बिलाइ मोसायो
साफ्रे सुफ्रे सुदेम बारजोँ।
1197
दाउसिना बिरलांदोँ
खोलो खोलो बारजोँ
बिफांआ नायहरदोँ बेसेबा मुहिनां।
1198
बेसेबा समायना मिथिँगाया
बेलासि नैबे समाव
नायहरो सोरगिदिँ आं
बेसेबांदि खुसि मोखांजोँ।
1199
बै सानखौ गोसो खांनानै
आं दिनैबो खुसि
बैसिम खारलांनो-
दाबो गोसो जायो।
1200
बै बुब्लिखौ नेनानै थायो
गोदान जिउ लानानै
फैगोन बै रंजानाया।
1201
बेयो नोँ आरो आंनि
समायना समायना सोरजिनि सोरजिया
मिजिँ बिनिनो गोरबोमानि।
1202
सानफोरा थांगासिनो दं-
बै गामि बै गामि
आं गेलेनो मोनबोदोँमोन।
1203
बै अरन बै अरन
मै सेसा होनो मोनबोदोँमोन
बिफां बिफां दाउसिन गावनो मोनबोदोँ।
1204
हालो दैलो आगोलनि समफोरा
मैया दाख्लैनि सानफोरा थांदोँ
आंनि गोरबोजोँ बेसेबा सान्नायफोरा
थमेन थमेन गेवलांदोँ।
1205
गोरबोआव फेँफोनाबादि
बोलो गोरा जोहोलावबादि
सानस्रिया बोहैयो बिखा हुब्लिरलाङो।
1206
खबाम लायै लायै
गोरबोआ हान्थियो आंनि
रुगुं गैयै जिउनि बे लामाजोँ।
1207
गोदै बे रोजाबनाया
हगारो खौऔनि गारांजोँ
मुलुगाव जुगामि गालांनो।
1208
आंनि गोसोआव जेसेबां बोलो
मिथिगौ आं-
बोहैलांगोन निजोरा बियो।
1209
आंनि आथिँनि आगाना
थाबथाया गोरिबनि बेन्दोँआव
सिंखावलांगोन गोखा रोदामानि-
1210
फरायसुला आंनि जिउआव
सोदोबनि सोदोब जिउनि
रंगिना रंगिना रैसुमै खबामनि।
1211
सोमखोर दुब्लियाव
मोनाबिलि मोनाबि
रिँखांफैयो मेथाइ दाउसिननि।
1212
जोबोद रंजानाय गोरबोजोँ
मिथिगौ आं दिनैबो
बैफोरमोन बुब्लिनि हांख्रायनाय।
1213
खोमसिया बिरबोदोँमोन
जोँमानि आनज्रायलांनायाव-
मोनाबिलि गोजोन सुदेम बारजोँ।
1214
खोलो खोलो बारनाय
नैबे गोजोन बाराव
बेसेबा खुसि आं-
जोँथि माथि हाथर्खिनि सोरांआव।
1215
बेबादिनो बिलिर फैदोँमोन
आंनि मिनिसुलु मिनिनायाव
मिथिँगानि गोजोन बारआ।