अरननि दाइरि 4.02 थेख्ल आरो खुसेँग्रा Poem by Ronjoy Brahma

771
स्राय स्राय बेसेबा खुसिजोँ
गावनि गोसोबादि बोहैदोँ दैसाया,
दैसानि सेर सेर रिदि-रिदां
थाइगिर बिफांआव फिथाइ।
772
सारि सारि थालिर बिफां
गोबां बिफांआव गोमोन फिथाइ दं,
दाउसिनफोरा गावनि उदै बुंजासे जानानै
फोर बिरलांदोँ आरो गुबुन बाफैदोँ।
773
रंजानाय आरो बेसेबा खुसिनि
सुखुनि अनजिमा गैया बिसोरहा,
खुसेँग्राया थांफिनब्ला थेख्लआ
सिरि मोन्ना जोबोद गोमो हाबनायसै।
774
उखैनायजोँ सोरगिदिँ मेगन फिदिँना
बियो थालिर फिथाइ गोमोन नुबाय,
आरो गोख्रैनो खाथियाव थांनो हमबाय
बियो बिफांखौ बादिँग्लायनायसै।
775
गावनि उदै बुंजासे मागा-मुगा
बियो गोख्रैनो जानो हमबाय,
उनाव दै लोँनो नागिरब्ला
मासे मोसाया सोगोम हरबाय।
776
थेख्लआ जोबोद गिनो हमनायसै
मोसाखौ नुनानै बियो खारनायसै,
मोसाया बिखौ होसोनो हमबाय
थेख्लआ जोबोद गोख्रै खारबाय।
777
हां गहां गहां जालायनाय मेंग्लिना
थेख्लआ खारदोँ आरो
मोसाया फिनज्राब फिनज्राब बारनानै
बिखौ मोनहां मोनहां होसोदोँ।
778
बेसेबा गिदिर अरनखौ
सिँखाव सिँखाव थेख्लआ मोनफैनायसै
बेसेबा गोजौ हाजोनि थिखिनियाव
फैलाव अरनखौ हाजोनिफ्राय नुहरो।
779
एसे गोजानाव मोसाखौ गारबोनानै
दोम थाथनानै बियो हाजोनिफ्राय
खोल खोल जोँनाय आरो
आलो आलो बोहैनाय दैखौ नुहरबाय।
780
दैसानि सेर सेर समायना-रमायना
फामे आरो थब्ल बायदि मेथखा बिबारफोर,
गेवलां-गेवथां बिबारनि सेर सेर
गोबां फुरहाब दाउबनि फालो।
781
बाहां-बिरहां बायदि आगरनि
सिखिरि गां फुवारना मोसाग्लांदोँ,
हांसो सिलारि आरो फानखावरि
दैनि दाउसिनफोरा दावबायदोँ।
782
खायसे थालिर गायदोँ
दै सिङाव सानस्रिदोँ आरो
थंब्लेद सायाव नुजाखांदोँ
गांखं बुब्राबना बाज्लदोँ बिसोर।
783
थेख्लआ खेबसे अख्रांआव नायहरना नुबाय
बेसेबा समायना गेवलांङै
जायख्लंआ सानखौ बेँखनदोँ
दुंरोम साना सोलेराव नांदोँ।
784
सेर सेर माख्ला-माख्लि
गुफुर गुफुर जोमैया गोजावदोँ,
जोबोद समायना जेरैबो
नायहरबाय थाथाव मेसेबनो बाथाव।
785
थेख्लआ उनथिँ नायहरना नुबाय
मोसाया बिनि खाथियाव सफैबाय,
लासै लासै आवगाय बोगासिनो दं
थेख्लआ लासै लासै फावसायनायसै।
786
उनाव बियो दैयाव मेगन मेसेबनानै
ज्रुम बाज्रुमनो हरनो हमनायसै,
मोसाया बिखौ गल' नायहरनायसै
बियो खुगा सिहं जानानै थाबाय।
788
खेबसे मेगनखौ बेखेव फ्लांनायाव
बियो नुनायसैदि गेवलां समायना,
बारसे फामे बिबारा बिखौ
आखाय फुवारना आजावना दं।
789
दैयाव ज्रुम गोग्लैना बियो
बेसेबा गोथौ दैयाव दोबैबाय,
दैनि दाउसिन दाउला आरो
बेरे-सिखिरि गासैबो गोमोबाय।
790
ओजोँ-हजोँ बिरग्लांनो हमबाय
बिसोर दैनि सेर सेर होँगो-दोँगो
जेरैबो बिरग्लांना गाबख्रावबाय
बिसोर अख्रांआव बिरग्लांबाय।
791
लासै लासै ओरैबादि गोथौसिम थेख्लआ
गोदो लांनायसैदि बियो आरोबाव
सिखार फिन्नो गोहो मोनाखिसै
बियो थालासिम लासैनो गोदो लांबाय।
792
बिनि खुगा गन्थंजोँ आरो
खोमाजोँ दैया बुरबुर हाबनो हमबाय,
सासे सिख्रिसिख्लाया नुनानै
गोख्रैनो फैनो हमनायसै।
793
बियो गावनि आखायजोँ बामखां फैबाय
आरो गावनि गांजोँ बियो
गोख्रैनो सानस्रिना बिखौ
बोरियाव बोखांनानै दोन्नायसै।
794
दान्दिसे उनाव बियो दैयाव
थोरोब हाबलांफिन्नायसै नुयैयाव,
बिरग्लांनाय दाउसिन-दाउलाफोरा फैनानै
थेख्लखौ सारिगिदिँ बेँखन फैबाय।
795
बिनि बिखाखौ दुबदुब मावनाय नुनानै
बिसोर हानजायै मेथाइ रोजाब्बाय,
दैसानि सेराव दाउसिनफोर गारां
अख्रांआवबो दाउसिननि देँखोआ गोमसारबाय।