Ang Papel Ng Anak Sa Pamilya Poem by Bernard F. Asuncion

Ang papel ng anak sa pamilya
Ay ang paggalang sa ama't ina;
Ang pagsunod sa kanilang payo
Ay totoong mabuting prinsipyo.

Ang kailangan n'yang magampanan
Ay ang pagtuklas ng karunungan;
Dapat na mag-aral na mabuti
Upang mapaunlad ang sarili.

Sa masama ay huwag tutulad
Dahil sa panganib mapapadpad;
Umiwas sa ugaling baluktot
At magtaglay ng banal na takot

Huwag mag-aakyat ng suliranin
Dahil sa pagbugso ng damdamin;
Karangala'y dalhin sa magulang,
Papuri sa Diyos na lumalang.

Utang na loob ay tinatanaw
Sa nag-aruga gabi at araw;
Di ipinagwawalang bahala
Ang papel ng anak sa pamilya.