ꠄꠈꠟꠣ ꠃꠛꠣꠘꠤꠔ ꠀꠍꠟꠣꠝ ꠀꠉꠘꠝꠣꠁꠀ ꠇꠥꠀꠔ
ꠎꠥꠔꠏꠤ ꠝꠦꠅꠀꠍꠞꠞ ꠄꠈꠦꠞꠦ ꠉꠣꠟꠣꠔ
ꠡꠤꠀꠋ-ꠉꠣꠋ ꠎꠦꠛꠣꠄ ꠃꠔꠞꠦꠖꠤ ꠉꠦꠍꠦ⁕
ꠖꠦꠈ꠆ꠍꠟꠣꠝ ꠚꠣꠠ-ꠚꠞꠛꠔ ꠅꠁꠉꠦꠍ ꠟꠣꠟ ꠍꠥꠞꠥꠇ
ꠢꠣꠁꠞꠛꠣꠘ꠆ꠖꠣ ꠉꠣꠍꠛꠤꠞꠤꠇ ꠎꠦꠘ ꠐꠈꠐꠈꠣ ꠝꠥꠞꠉꠣꠍꠥꠐ⁕
ꠄꠝꠘ ꠚꠘ ꠡꠤꠀꠋꠞ ꠚꠣꠘꠤ
ꠔꠣꠁꠡ-ꠃꠐꠣ ꠡꠖꠣꠉꠞꠞ ꠎꠣꠏꠞ ꠟꠣꠘꠤ⁕
ꠁꠉꠟ ꠃꠠꠤꠃꠠꠤ ꠀꠡꠝꠣꠘꠛꠣꠄ ꠏꠣꠚꠐꠣ ꠝꠣꠞꠦ
ꠘꠤꠘ-ꠘꠣꠄ ꠚꠣꠘꠤꠛꠣꠄ ꠝꠣꠍꠣꠁꠘꠔꠦ ꠢꠣꠔꠞꠦ
ꠢꠈꠟꠔꠣꠄ ꠘꠥ ꠔꠥꠇꠣꠄ ꠈꠣꠟꠤ ꠝꠘꠞ ꠈꠣꠁꠡ⁕
ꠀꠈꠔꠣ ꠀꠈꠔꠣ ꠝꠥꠁ ꠚꠠꠤꠎꠣꠁ ꠗꠥꠘꠅ
ꠈꠃꠍꠣꠁꠘ ꠛꠣ, ꠈꠦ ꠀꠍꠦ ꠢꠇ꠆ꠇꠟꠔꠣꠞ ꠝꠥꠟꠅ?
ꠚꠦꠞꠦꠘ꠆ꠒ ꠛꠘ꠆ꠗꠥ ꠟꠁꠀ ꠁꠘ ꠈꠔ ꠀꠁꠟꠣꠝ,
ꠡꠝꠣꠎ ꠝꠦꠟꠅ ꠝꠣꠡ-ꠛꠞꠍ ꠈꠔ ꠈꠣꠐꠣꠁꠟꠣꠝ⁕
ꠎꠥꠀꠘ ꠀꠍꠟꠣꠝ ꠛꠘ꠆ꠗꠥꠁꠘ ꠢꠈꠟꠐꠤ
ꠎꠤꠛꠘ ꠀꠍ꠆ꠟ ꠚꠥꠞꠚꠥꠠꠣ, ꠔꠦꠎꠤ;
ꠔꠣꠇ꠆ꠇꠔꠖꠣꠞ ꠅꠁꠀ ꠚꠣꠠ ꠀꠞ ꠉꠣꠋꠉꠞ ꠟꠣꠈꠣꠘ
ꠖꠥꠀꠞꠦ-ꠖꠥꠀꠞꠦ ꠊꠥꠞꠤ ꠉꠣꠁꠔꠣꠝ ꠖꠦꠡꠚꠦꠝꠞ ꠉꠣꠘ⁕
ꠁꠀꠖ ꠅꠄ ꠘꠤ ꠝꠣꠏꠉꠣꠋꠉꠅ ꠢꠣꠔꠣꠞ?
ꠜꠣꠅꠀꠁꠟ ꠘꠣꠅꠀꠁꠘ ꠀꠐꠈꠣꠁꠔꠦ ꠓꠦꠅꠄ ꠈꠞꠔ ꠝꠣꠁꠞ!