Indoda Emadodeni Poem by Lungelo S. Mbuyazi

Uyindoda Emadodeni
Halala! Nganeyakweth' usebenzile,
Wawis' izindonga zaseJeriko!
Avuleka amasongo sayibon' indlela.
Indoda, uyindod' emadodeni,
Ntombi zimqabula ebumnyameni,
Ngoba ekukhanyeni zesaba amasoka azo;
Ngiyaqiniseka lé wayithola ebumnyameni;
Yaletha ukukhanya ebumnyameni,
Yadelela izimpikiswano zomndeni,
Yazidela ze nibe nyamanye,
Noma konke sebek' khulumile.
Amazw' alumayo sebewathumelile,
Bekuthuka ngokub' umlanjwane.
OMaMgobhozi bethi siyoke sibone!
Bethi kazi ingane iyodlani - imbatheni?

Namuhla imbeth' uthando nenjabulo!
Isiphetho sendaba singcono kunesiqalo.
Les' isibonakaliso sokuth' ukubekezelile;
Ukulala ubal' izinkanyez' esikebheni.

Bheka! Namuhl' usuphumelele,
Usuthwel' umyezane wobudoda;
Usuqhakaz' okwentwasahlob' uqobo.
Sonk' isizwe siyoziqabula ngawe.
Sonke masihalalise sithi: Halala! Ló

UMbuso kaThokile uyindoda emadodeni!