गोसोनि सिखोला गोसोबादि महरहोनो हायो Poem by Ronjoy Brahma

मालायनि थाखाय हांगार फिथर जानो हागौ
आंनि थाखाय नोंनो सना फिथर
जायखि जेखि बुङामानो नोंनो आंनि थैस'-थांस'नि

नों गोसोनि सिखोला
रावनिबो नङा जानोबो हाया खालिबोल' आंनि
नोंखौ गोसोबादि महरहोनो हायो आं
गोसोबादिनो अननो आरो मोजां मोननो हायो
जिउ गैया नोंहा
आं थासान्दि आंनि बे जिउजोंनो नोंखौ फोथांना लाखिगोन

रावबो मिथिनोबो मोना जोंदि सानैजों मोजां मोनलायगासिनो दं
दिनैनिल' बाथ्रा नङा
सोरबाफोर सोङोबा फोरमायनानैबो फोजोबनो हानाय नङा
बुजिनोबो गोब्राब हमदांस'नोबो इनायनो गोब्राब

फुरा खम'थाया आंनि आखाय मोजोमावनो
गां थुनानै होनो हायो आं नोंनि बिखुंआव
बिबार थुनानै होनो हायो आं नोंनि खानाय फिथराव
सोरबाफोर मेगन सायोब्लाबो रावबो नोंखौ सोगाबनो एबा दुखु होनो हाया

गासै दैमा- दैसा बिलाद लाथानि गासै लैथो -लैथोमा
दंनायमानि हाजो आरो हायेन गासै अरनबारि जोंनिनो गेलेग्रा थिलि
हा आरो नखोरां ग्रह नक्षत्र जेरावबो थाङै गैलिया जों
सोरबाफोर अखा खोरोमनायबादि सोगोमदावनानै होबथानो हाफेरदोंना?
गासै सान आरो हर गोसोबादिनो गिदिंथिंदों जों रावबो सिगि-सग'थ' खालामफेरनो हायाखै