नोङो बहा थांगोन बेखौ थिग खालामनानै लाग्रो Poem by Ronjoy Brahma

जिउआ जोबोद बेसेन गोसा
नोंथाङा मिनिथाव होननानै सानदोंब्ला बेयो नोंनि खोथा
जिउनि थाखायनोथ' गासै सिमां आरो मिजिं
जिउखौ लानानैनो नोंनि गोरबो आरो बेनि हास्थायनाय
गांनाय आरो उखैनाय

आं मिथिगौ बिनि लांगोनायाव दं गंसे गारि
बेखौ लानानैनो बिनि जिउनि गासै फारिलाइ
सान ओंखारनाय लोगो लोगो बे गारिखौ नायनानैनो बियो सानो जानांगौ
दिनै बहा थांगोन, बबेयाव आरो मा मावहैगोन

बिनि खाथियाव सोरबा गेदेमा सुबुङा गसंनानै थानायमोनब्ला
जानो हागौ बिखौ बुंगौमोन-
नोङो बहा थांगोन बेखौ सिगाङावनो थिग खालामग्रो
बेनि उनाव गारिखौ सालाय
गोदाव सोराव गारि सालायथिंनानै फेट्रलखौ नोस्थो दाखालाम
ओरैनोबाबो बेयो लासैनो बुहुम बिखानिफ्राइ जोबलांगासिनो दं
गोनांथि गैयाजासे सोदोब आरो बारखौ गुबुंले दाखालाम
गावनि आरो मालायनि बेसेन गोसा समखौ नोस्थो दाखालाम

नाथाय रावबो बिखौ बोसोन होग्रा गैया
ननि मानसिफ्रा बिखौ हगारसारनानै होदों
जायफोर बोसोन होनो खाथियाव फैहां फैहां जायो
(बबेखानि बिसोरो बोसोन होयोब्ला गाज्रि मोनजानो गियो)
बिसोरबो बिनि थाखाय गनायजाथाव नङा
बेनिखायनो बियो सानफ्रोमबो गोसोबादि सालायो गावनि गारिखौ
दा बिनि मोदोम गंसे जाब्रबथायजों जोखोम जानायनि ख्रि ख्रि दागो