खाफालाव लिरनाय गैयाबाथ' गैया Poem by Ronjoy Brahma

आंल' गोसोथोनानै मा जानो?
सिरि सिरि मोननो हास्थायमालाय मा जानो?
बिबा आंखौ मा सानो-
गोसोथोयोना गोसोथोआ बिबा!

बिजों खाब जागोनना जाया
खेबसे गावखौनो बिजिरनानै नायनायनायसै आं
आंहा मा दंजायो?
माखौ लानानै आं थिफुद्ला खालामनो हानो?
आंनि फारसे माखौ नायनानै बियो आंखौ मोजां मोननो?

जुदि आं बिनि सिगाङाव बुङो-
आं नोंखौ मोजां मोनो होननानै
माबादि रावजों बियो मा फिननाय होफिनगोन?
जुदि बियो ओरै बुङोब्ला-
आंहा मोजां मोननाय दंखायो
आं नोंजों खाबजानो हानाय नङा
सरि!

बेफोर बाथ्राखौ बिनि खुगानिफ्राइ खोनायोबा
आंखि गोरलैयै गोसोखौ बुरखायनो हागोन?
जोबोद लासिंसिं जाथारगोन
बेनिखायनो मोजां मोननायनि बाथ्रा आं बुङा बिनि सिगाङाव
आंनि गोसोनि खोथाखौ बियो गावनो बुजिथों
सिरि सिरि थायोब्ला थाथों
खाफालाव दङबा सिरि सिरियैनो सानसे जागोन जुलि
खाफालाव लिरनाय गैयाबाथ' गैया
बे मोजां मोननायनि सल'आ बेबादिनो थांथों ।