फंनैसो बुंनि आं मा लुबैयो नोंनिफ्राइ Poem by Ronjoy Brahma

लामानि सु गाख्रेबलांनाय जोहोलावआ
लांदांआवनो उनदुना थानाय
न' गैजायै गामिनि मानसिफोरखौ बुंलांबाय थादों
सान फैगौ मेगन दिनथिनानै नोंसोरनि मोदोमनि सि बोखारनो
आरो मोदोमाव दै लुफावनानै होनो
दानो सिखार नङाबा नोंसोर रावबो बारगनाय नङा

साफा सानैया सिखारनायसै बाबांसिनथारब्लाबो
थाबायनो जुरिनायसै माखासे दोलो
बेवहायनो माखासे रंजाबाजा खालामनायसै
गावनि समबादिनो सानआ गसंफैनायसै बिसोरनि खर' सायाव

हाजोआव गसंनायनि सिमां नुनाय
उदांस्रि जोहोलाव
सासेल' लोगो मोनलांदों बियो गावजों लोगोसे
बिनि लानजाइ हमनाय हाजार लोगोफोरा
लामायावनो गथ'फोरबादि गेलेना सान दोबैहोदों

हाजो नुहरनाय लैथोमा सेराव गसंनानै
गावनि फोथायजाथाव लोगोखौ बियो बुंनायसै
लोगो बे लैथोमाखौ नाय
बेखौ गिनानैनो बेसेबांदि जोहोलाव फावसयलांदों
बेसेबांदि फावसयलांदों आगानसे दावगानायनि उनाव

फंनैसो बुंनि आं मा लुबैयो नोंनिफ्राइ
लोगो नों बे लैथोमायाव बारसोम
गासै बोराबनाय आरो लाजिनांनायनि मलारखौ बुखुनानै
नाफोरबादि सानस्रिनानै बै हाजोखौ नायहर
जाय हाजोआ गोथौ लैथोमायाव गसंनानै खर' थिखांदों
बेवहायनो दं जोंनि गोथौ सोमोनदो