आं नोंनि दाहोना रजे Poem by Ronjoy Brahma

नों आंखौ नोजोर होबाय थायो
दानदिसे थेन्थौनानै सुखि थानो मोना आं;
जारौ सान्दुंआव माय लामो आं
बेसेदि गोदोलाङो जाखांफिनो हार्थखि-अलंबार

दिनैनिल' नंलिया आं रजे नोंनि दाहोना
समआ बेसेदि थाबथायो नोंनि आथिंआव
आं बेनिनो राहा लायो;
नों जेबोला मुजिथाव जोबोद सियाइनानै थायो

आंनि खामानिखौ सानआ नायखोमायो
लासै लासै बियो होस्रिख्रावो;
अब्लासो आं बुजियो आंदि सासे दाहोना
बिगोमानि खामानिखौ फोजोबथारनांगोन लेन्थि मारिनानै

आंनि आखायजों आबादआ बाज्लखाङो
दुखुनि खौरांखौ आं मोनो; जेब्ला आं सिरिमोनो
आंखौ फोजानाय दाउसिनफ्रानो
मोसायै-रंजायै फारि फारि जालांजोबो फिथाइ

नै रजे सान्दुं-अखा नाङो नोंनि बिखुंआव
नों उन्दुयो अब्लाबो एमाव बनानै दोनजानाय सिमाबादि
थेवबोदि आं नोंखौ बेसेबा मोजां मोनो
आं नोंनि दाहोना रजे

हुरा हुरा नोंखौ फोजायो आं हाखु-दाखु
बोनानै लाङो लिलि बिबारनि सेराव दानदिसे
नों बेवहायबो गोजोना; आरोबाव नेनानै थायो बिरबोनाय बार
आबाद दुब्लिआ बेबादिनो हाथरजों बुंफबो

नों खासि बिबारआव जिरायनानै दावबायनो लुबैयो
नाथाय नोंनि सिमांआव दा आरो उदां गैलिया;
जबा बिबारनि खामसालियाव जानजि सोमावनानै
नों मोसाबाय थायो थेवबो। आंबो नेयो

सोरां लेंहरग्रा दाउमासार दाउसिननि गावजोंगाव खेबलायनाय नुनानै
रजे नों बोराबखो ना मादि सानखो?
बुं बुं नों गावखौ बावगोमानाया बेसे गोदै?
दैनि फेंफोनाबादि आं नोंखौ बोहैहोनो हाया दे