अरननि दाइरि 1.08 अरना रुम्बांखौ नागिरनायनिफ्राइ Poem by Ronjoy Brahma

123
खर'आव गाराय जानायाव
हाग्रा मुलि फुन्नानै,
अरला बिगुरजोँ खानानै लादोँ
खुसियै एम फारसे फैदोँ अरना।
124
नाथाय एमाव जेब्ला सफैयो
रुम्बांखौ नुयैलाय जोबोद दुखु मोनबाय,
लोगो लोगो अरन गेजेराव
गोख्रै हाबनानै नागिरबाय।
125
अरन सिँखाव सिँखाव बियो
ओरै थांलाय हरै थांलाय,
सिनारि अरन गेजेराव नागिरबाय
दाउसिनफ्रा खिन्थाबाय ओरै ओरै।
126
दसे उनाव बियो खोनाबाय
सोरबा सिख्लानि गाबख्रावनाय,
हां गहां गहां खारदोँ बियो
अरना गारांखौ हमनो हाबाय।
127
बियो रुम्बांआनो जानो हागौ
बे फारसे होसोलांबाय अरना,
गोख्रैनो आगान गोलाव गोलाव फोलावनानै
बियो गोख्रैसिन खारलांबाय।
128
गोजानाव नुहरबाय अरना
सोरबा रुम्बांखौ सासे लंथं मानसिया,
मोनहां मोनहां होसोगासिनो दं
खारलांदेरबाय अरना बे फारसे।
129
खारै खारै रुम्बांआ अरनखौ नुनानै
बिनि खाथियाव खारबोथारबाय,
जोबोद मेँनायजोँ सिरिया रुम्बांआ
अरननि बिखुंआव थाखोमाबाय।
130
फलाना अरननि सेराव लाजिबाय
बिनि उनाव रागा दावखोबाय,
दोम थाथ'नानै बुंबाय बियो-
''सोर नोँलाय?
132
बे मानसिया आंनि हिनजाव
आंनो गथायनानै हो,
नङाब्ला बोरैबासो जागोन
गोख्रै गथायनानै होदो।''
133
सिरिया रुम्बांआ मेँनायजोँ बुंबाय-
''बे मानसिया गुण्डा मैखारि
बियो सासे लांसुनिया फलान
अरननि मोदै बोहैहोग्रा।
134
बिनि गोरबोआव गोरबो गैया
बिनि जिउआ अन्थाइ गोथै,
मैहुर खालामो बियो अरनाव
अरननि जिउ जुनार गावथारो।
135
बियो आंनि गोथार सोलेराव
हांगार फुन्नो फैदोँ,
बियो आंखौ नोजोर होदोँ
आंखौ जिनाहारि खालामनो होसोदोँ।
136
बे लांसुनियाखौ फोजोब दानो
बे अरनाव फोर्बो जाथोँ,
बियो अन्थाइ बिखा जुनारसिन
बिनि बिखाखौ सौफ्ले।
137
अरननि गासैबो खुसि जाथोँ
मुलुगा सोमखोर जागोन,
बे मैखारिखौ फोजोब
बिनि जिउखौ जमनो गथाय।''
138
दिउ दिउ रागा जोँनानै
फलाना अरनखौ सौबाय,
अरना सानायजोँ बिलिरबाय
बियो हां मोनै जाबाय।
139
दान्दिसे उनाव फलाना सौबाय
नाथाय अरना थाब्रुम हमथाबाय,
आरो अरना बोलो होनानै
सौगासिनो सौबाय फलानखौ।
140
फलाना खांग्रां खुग्लुब जाबाय
सिखारफिन्नानै फलाना अरनखौ सौबाय,
दान्थेबाय आरोबाव अरना
फलानखौ आथिँजोँ जोनानै होबाय।
141
उनाव सानैजोँ गुदा गुदि
नारा नाथा बुलायबाय,
गोबाव सम बेबो जेना जेना
बेबो सौवो बेबो सौवो।
142
बेबो जोयो बेबो जोयो
सानैबो गोबां मेँबाय,
सिरिया रुम्बांआ नायबाय थाबाय,
बियो मोखां खोबथेना थाबाय।
143
बिखुं मोन्नाय साना बेलासि जाबाय
दंफां खनाजोँ नायहरबाय,
सोरगिदिँ जेरैबो दाउसिनफोर
सोरगिदिँ जेरैबो जिउ जुनारफोर।
144
उनथाराव अरना फलानखौ
बेसेबा बोलोजोँ हमख्रबबाय,
आरो हाथाइ अरखेनानै
फलाननि गोदोनाखौ मस्रायबाय।
145
लोगो लोगो फलाना हां गैयै
आरो जिउ गैयै जाबाय,
फलाननि गोथार जिउआ
सोर्गो फारसे मिनिखुसि बिरलांबाय।
146
फलाननि जिउआ गोजाननिफ्राय गोजान
गुबुंले गोरबो देहानि नागारबाय,
जिउआ मोसा मोसा थांबाय
गोमा हैबाय मेगन नुयैयाव।
147
जमा मिनिसुलु मिनिनानै
गुफुर जोमैयाव थाखोमाबाय,
दुलाराइ अरननि बिफां-लाइफांआ
ख्रब ख्रब आफा खबनानै होबाय।
148
हाजो खना खना थानानै
नायहरबाय जिब जुनार,
बिफां-लाइफांआव बानानै
नायहरबाय मुसुरबाय दाउसिनफोरा।
149
समायना रमायना रैसुमै मेथाइ खनबाय
रुम्बांआ अरनखौ गुगुरुब खुलुमबाय,
अरना बिखौ बोखांबाय
आरो बिनि खर'आव बिलिरना होबाय।
150
रुम्बांआ बेसेबा लाजिगुसुयै
अरननि मोखांआव नायदेरनानै बुंबाय-
''दिनै नोँ आंखौ रैखा खालामबाय
बिनि थाखाय नोँखौ साबायखर।
151
नाथाय बेबादि अरन गेजेराव
नोँ आंखौ लाबोआमोनब्ला,
बेबादि खैफोदा जानायबो नङामोन
बिनि थाखाय नोँबो दाइनिगिरि।''
152
बेबादि बुंखांनानै सिरिया रुम्बांआ
बेसेबा दुखु गोनां गाबबाय,
बिनि उनाव गावनि सिगैयै
लंथं सोलेरखौ नायनानै गाबबाय।
153
लाजिनायखौ लानानै बुंबाय-
''नायसाय आंखौ,
आं दा लंथंसै
दखनाया दैसायाव गोजाव लांबाय।
154
आं दा माखौ गानगोन?
नोङो आंखौ अनोब्ला,
आंनि दखनाखौ नागिरना होफै
आं आरो जोबोद लाजिबाय।''
155
अनथाव सिरिया रुम्बांआ
गावनि रागाखौ दिन्थिदोँमोन,
दुखु मोन्नायजोँ अरना
थाइगिर दैसा फारसे नागिरनो थांबाय।
156
अरननि उन उन गोसोसेयै
गावनि सोलेरखौ नायै नायै,
रुम्बांआबो थांफाबाय
जोबोद गाबदोँ बिनि गोरबोआ।