Beautiful, A Love Poem By Pablo Neruda In Hindi/Urdu Translation Poem by Ravi Kopra

Meri jaan, tum kitni sundar ho
jaisay jhaag bhra pani fohaaray se
jag-magata nikalta hai
O meri sundar dilruba
vaisay hi hai teri muskrahat
tere sundar cheray pe

Tere haath aur paon hain aisay
jaisay chaandi k banay k khilanay k hoN
jab main tumain dekhta hoon
phool khilnay lag jaatay hain mere dil main
meri jaan, tum kitni sundar ho

Bhooray rung k duppata hai tere sir pe
is gehray rung k shehad ko jab man dekhta hoon
mere dil tumain chahta hai, is ko aag lag jaati hai
meri jaan tum kitni sundar ho

Teri aankhoN is jahan ki nahin hain
un main saari duniya basti hai
saaray dariya behtay hain
un main mera ghar hai
meri zindgi ki manzilaiN hain
muje raah vo dikhatai hain
jis pe main chalta hoon

Tere bhooray mummmay bhooray anaaj
aur sonay k chaand se banay huay hain
meri baahain teri kamar pakaDay
dariya jaisay laganay lag jaati hain
jahan tum hazaaron saloN se rehti a rehi ho
duniya main kisi ka koola teray jaisa nahin hai
prithvi ne shayad koi jagah cHupa rakhi hai
jahan se tere badan ki khushboo aati hai
aur tehray badan ki chaal laa-jawaab hai
meri jaan tum kitni sundar ho

Teri awaaz, tera badan, teray nakhoon
tera sub kuch, teri jhalak sub mere hain
jab tum chalti ho, araam karti ho
geet gaati ho, so jaati ho
dukhi hoti ho ya swapnay dekhti ho
paas hoti ho ya door hoti ho
tum hamesha, hamesha meri hoti ho
meri hoti ho tum, meri jaan, tum kitni sundar ho.