Sisithele Emafini Poem by Siyabonga A Nxumalo

Hloba ngenhliziyo emnene.
Ugqize ngembekezelo nempokophelo.

Ungabi yingelosi, lokhu nami
Nginawami amaphutha.
Kakade ayisoze yabakhona
Kulona omagade ahlabayo.

Angibheke kunotha kwakho,
Kakade kuyize leze.
Kuphela inhliziyo ebekezelayo.

Lapho kungasakikiligi qhude,
Kungasamili nambuya ezaleni.
Ibhodwe lomona nenhlebo
Lichicha, usi luzoyiza.
Ungembi wembulule.

Lapho iminjunju kungeyemihla,
Ungakhihli esendlovukazi uNandi.
Ungathi galo yephuka.
Kepha wenanele leyominjunju.
Ungalibali kodwa, ungithanda ngeqiniso.

Ungabheki ubumsulwa bami,
Funa ulibale yisizathu,
Isizathu sokuthunga lembenge.
Isizathu sokuhlangana kwezidalwa ezimbili.
Yiba woqiniselayo.

Ingomuso liyosibhadama sigugusheka,
Siphokophele empumalanga.
Singehlulelani kepha sibonisana,
Sibhunga ngemfihlakalo yalomthunzi.

Sikhosele sobabili kulomthunzi.
Bakhe umkhanya,
Bafifiyele,
Bafifiyele,
Bafifiyele.

Sisithele emafini.