Bhubesh Brahma

Bhubesh Brahma Poems

The Best Poem Of Bhubesh Brahma

भादोरनि अखाफोर

हनै जेरावबो सोरां
बोसोरनि गोजोंसिन गोजोंजों मोदानफबदों मुलुगा
रंजानायजों समायसारदों बुहुम बिखाया
रुजु-रुमु संसार जादों जिबि-जिरादफोरा।

हे गशाई!
दाखा- दाखा जोमै दाखा बर'नि अखोरांआव,
साथिया-खालामजानायेनि सिथ्लायाव,
सोराङाखै दाबो बर'नि नखराव,
सुस्राजायाखै दाबो बर'नि थै।
फ्रिव दा गुम दा गुम खाम दामाखै
दावहाथिलिआव सिलायनि बिखा खामहोनाय सोदोबसो,
थर'र'र'रि रिथ थर'र'र'रि रिथ सिफुं सुआखै
गोथैसालियाव रान्दि बर' बिमानि गाबनाय सोदोबसो,
ग'ग' ग'ग'लिं ग' सेरजा हुआखै
बिखा खामहाबनाय बर' गामिनि दुखुनि देंखोसो।
बिलिफां समाव ओंखाम जाहां जाब्लानो सुथुरनि बुलि जानांनाय
अनसुलि बर' बिमानि इनायै जिनाहारि खालामजानाय
खाफालनि गोजा सिन्दुर खोमोरनांनाय फोरखौ
नों बावबाय नामा दिन्थिना होनो बिजिरगिरिनो?
थारैनो नों अन्थाइ बिखासो नामा भादोरनि अखाफोर?
नोंनोथ' मिथिगौ बर'हा रायजो दंमोन राजा दंमोन
खृष्ट'गिबि 3500 मायथाइनिफ्रायनो संसार जाबोदोंमोन
धोरोम, हारिमु, आरिमु गासैबो दंबोयोमोन,
बेफोरखौ नों मानो दिन्थिना होदिया?
बर'नि अखोरांनि दाखा-दाखा जोमैखौ नों मानो नेवसिदिया?
रोजा-रोजा मुंख्लं जोहोलाव-जोहोलावजोफोरनि बिखानि दुंब्रुद थैया
दाबोनो बोहैगासिनो दं बुरलुंबुथुरनि दै जानानै,
रोजा-रोजा मुंख्लं जोहोलाव-जोहोलावजोफोरनि हारा मोदोमा
दाबोनो नायगासिनो मिथिंगा जाना,
सैनांनाय बर' बिमानि मोदैया
दाबोनो फोरमोयो जोंनो अखा जाना।
हानाय नङा, बारग'नाय नङा नोंबो
मुंख्लंफोरनि सावनिफ्राइ,
थारैनो नों अन्थाइ बिखा भादोरनि अखाफोर।

Bhubesh Brahma Comments