J.k. de Quiroz


Bubutungon Kita By J.K De Quiroz - Poem by J.k. de Quiroz

Bubutungon kita pataas hanggang
sa tanos an satuyang tindog.
Sa puon, matios kita
hanggang sa makanuod magkamang.

Bubutungon kita pataas hanggang
sa makanood kita nagtukaw
asin makatanaw; makangaran
nin mga bagay-bagay.

Bubutungon kita pataas antes na
kita tatao na maglakaw
asin maghanap nin mga kasimbagan
sa mga kahapotan na dae napupuho.

Bubutungon kita pababa
pag satuyang naaraman an kasimbagan -
na kita luway-luway na bubutungon
antes na may natatada sa satuya.

Bubutungon kita pababa
puon sa liog sa supog na
kita, minsan, naghanap kasimbagan
para kita malinawan -

dae kita sisimbagan sa gabos na oras,
dikit-dikit na bubutungon nin daga
an satuyang abaga hastang
kamang na sana an nagigibo ta.

Bubutungon kita pababa;
an satuyang lawog nakaduta sa salog -
asin garo nakikihuron an daga sa satuya,
'Napungaw ako sa saimong kamot asin tuhod.'

Bubutungon kita pababa
hanggang sa an hinanghos hinulbot na;
an paghiling, dikit-dikit minadiklom,
igwa kitang kamot; bitis na nakalubong.


Comments about Bubutungon Kita By J.K De Quiroz by J.k. de Quiroz

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags

What do you think this poem is about?



Poem Submitted: Thursday, December 17, 2009



[Report Error]